Naligiissitaaneq - Kalaallit nunaanni killiffik 2019
Immikkoortitsinnginneq naligiissitaanerlu inuit pisinnaatitaaffiini tunngaviulluinnartuupput.
Qinngarsuilluni oqaaseqartarnerit kiisalu qanigisariinni nakuusertarneq immikkoortitsinermi ajornartorsiutaapput immikkut illuinnartut. Qinngarsuilluni oqaaseqartarnerit oqaaseqartarnerupput, inunnik assersuutigalugu inuiaassuseq, upperisaq imaluunniit atoqateqartarnikkut qanoq inissisimaneq tunngavigalugu nikassaaneruvoq imaluunniit nakkarsaaneruvoq. Qanigisariinni nakuusertarneq arlalitsigut suiaassutsitigut tunngaveqartarpoq, nalinginnaasumillu angutit arnallu akornanni pissaaneqarnissamut attuumassuteqartarluni.
Nalunaarusiami siullertut immikkoortumi ineriartorneq naatsumik nassuiarneqarpoq. Tulliuttutut immikkoortumi inuit pisinnaatitaaffii naatsumik nassuiaaffigaavut, soorlu nassuiaripput, Kalaallit Nunaanni immikkoortumi inatsisit annikittut. Ilanngullugu Kalaallit Nunaanni naligiissitaanermut immikkoortumi atasinnaasumik ineriartornissamut FN-ip nunarsuarmi anguniagaasa qanoq attuumassuteqarneri nassuiarparput.
Sammisat toqqakkat pingasut ukkataraagut innersuussuteqarfigalugillu, Kalaallit Nunaanni inuit pisinnaatitaaffii sukkut nukittorsarneqarsinnaanerinik. Sammisat tassaapput:
- Immikkoortitsinermut nalinginnaasumik inerteqquteqarneq aamma naammagittaalliornermi aalajangiisartunik pilersitsineq
- Inuit attaveqaqatigiittarfiisigut qinngarsuilluni oqaaseqartarnerit
- Qanigisariinni nakuusertoqartarnera
NALUNAARUSIAMI INNERSUUSSUTIT PINGAARNERPAAT
Ilaatigut innersuussutigaarput
- Suiaassuseq, sumiuussuseq imaluunniit inuiaassuseq, innarluuteqarneq, ukiut, atoqateqartarnikkut qanoq inissisimaneq aamma upperisaq pillugit immikkoortitsisarnermut, suliffeqarfimmi suliffeqarfiullu avataani nalinginnaasumik illersuisussamik Naalakkersuisut inatsisissatut siunnersuummik saqqummiussissasut, siunnersuummilu ilaassasoq allanut attuumassuteqanngitsumik naammagittaalliornermi aalajangiisartunik pilersitsisoqassasoq.
- Kalaallit Nunaanni Eqqartuussiveqarfiit pillugit Siunnersuisoqatigiit isumaliutigaat – pinerluttulerinermi inatsimmi tunngaviusut eqqarsaatigalugit – pinerluttulerinermi inatsisip allanngortinneqarnissaa tulluarsinnaanersoq, taamaasilluni qinngarsuilluni pinerlunnerit, soorlu Danmarkimi, pineqaatissiinermik aalajangiinermi sakkortusaaqataasartussanngorlugit.
- Naalakkersuisut qinngarsuilluni oqaaseqartarnerit akiorniarlugit, qinngarsuilluni oqaaseqartarnerit inerteqqutaasut qanoq akiorneqarsinnaanerannik kiisalu inuiaqatigiinni suliffeqarfiit assigiinngitsut, matuma ataani tusagassiorfiit tamatumunnga atatillugu pinaveersaartitsineq eqqarsaatigalugu qanoq inissisimasinnaanerannik nuna tamakkerlugu iliuusissatut pilersaarummik suliniuteqassasut.
- Kalaallit Nunaanni Politiit qanigisariinni nakuusernerit pillugit kisitsisinik paasissutissanik katersissasut saqqummiussillutillu, matuma ataani nakuusernerit nalunaarutigineqarneri, suiaassutsimut ukiunullu agguarlugit.
